МАК на сваім саміце 11 сьнежня зьняў забарону на правядзеньне міжнародных спаборніцтваў у Беларусі.
«Міжнародныя фэдэрацыі павінны працягваць устрымлівацца ад арганізацыі або падтрымкі міжнародных спартыўных мерапрыемстваў у Расеі. Гэтая рэкамэндацыя больш не распаўсюджваецца на Беларусь», — гаворыцца ў апублікаванай справаздачы МАК.
Акрамя гэтага, юным спартоўцам як зь Беларусі, так і з Расеі цяпер можна ўдзельнічаць у міжнародных юнацкіх спаборніцтвах і ў індывідуальных, і ў камандных відах спорту. Сярод іншага — у юнацкіх Алімпійскіх гульнях «Дакар — 2026».
Дарослыя атлеты такой палёгкі не атрымалі.
Алімпійскі саміт падкрэсьліў, што спартоўцы, асабліва юныя, «не павінны несьці адказнасьць за дзеяньні сваіх урадаў».
Санкцыі супраць дзяржаўных службоўцаў застаюцца ў сіле. Іх па-ранейшаму нельга запрашаць ці даваць ім акрэдытацыю на міжнародныя спаборніцтвы і сустрэчы — ні дарослыя, ні юнацкія.
ГЛЯДЗІЦЕ ТАКСАМА: Беларускім лыжнікам далі шанец кваліфікавацца на Алімпіяду пад нэўтральным сьцягам