У кастрычніку FIS абвясьціла, што захоўвае забарону на ўдзел спартсмэнаў з дзьвюх краін напярэдадні Гульняў у Мілане-Карціне, якія пройдуць з 6 па 22 лютага. Але рашэньне Спартыўнага арбітражнага суда на мінулым тыдні адмяніла гэтую забарону, адкрыўшы шлях для расейцаў і беларусаў да спробы кваліфікавацца на лыжныя спаборніцтвы, якія складаюць больш за палову праграмы зімовых Гульняў, піша AFP.
Удзельнікам спаборніцтваў па лыжных гонках і сноўбордынгу з дзьвюх краін было забаронена ўдзельнічаць у спаборніцтвах FIS пасьля ўварваньня Масквы ва Украіну ў 2022 годзе.
Але цяпер у прыватнасьці беларуска Ганна Гуськова, алімпійская чэмпіёнка па фрыстайле ў 2018 годзе, і расейка Анастасія Таталіна, чэмпіёнка сьвету 2021 года ў гэтай жа дысцыпліне, могуць паспрабаваць кваліфікавацца на Гульні.
Сьпіс спартсмэнаў з дзьвюх краін, якім дазволена спаборнічаць пад нэйтральным сьцягам, верагодна, павялічыцца.
«У бліжэйшыя дні і тыдні, па меры правядзеньня дадатковых праверак права на ўдзел і прыняцьця дадатковых рашэньняў, FIS апублікуе абноўленыя вэрсіі сьпісу AIN», — гаворыцца ў заяве FIS, якая тычыцца спартсмэнаў, якія спаборнічаюць пад нэйтральным сьцягам.
Міжнародны алімпійскі камітэт абвясьціў у верасьні, што спартсмэнам з Расеі і Беларусі будзе дазволена спаборнічаць на Алімпіядзе пад нэйтральным сьцягам, калі яны будуць адпавядаць строгім умовам.
Сюды ўваходзяць спаборніцтвы пад нэйтральным сцягам, удзел толькі ў індывідуальных відах спорту і праходжаньне праверак, каб даказаць, што яны актыўна не падтрымлівалі вайну ва Ўкраіне і не мелі ніякіх сувязяў з арміяй.
Такія ж умовы дзейнічалі і на летніх Алімпійскіх гульнях 2024 года ў Парыжы, на якіх спаборнічалі 15 расейцаў і 17 беларусаў, якія ў агульнай складанасьці заваявалі пяць мэдалёў.
На летняй Алімпіядзе-2024 у Парыжы беларускія атлеты, якія выступалі ў абмежаванай колькасьці і ў нэўтральным статусе, заваявалі чатыры мэдалі — залаты, два сярэбраныя і бронзавы, заняўшы віртуальнае 50-е месца ў агульным заліку.
Да гэтага часу два расейскія фігурысты і адзна беларуска Вікторыя Сафонава атрымалі зялёнае сьвятло на ўдзел у Алімпіядзе пад нэйтральным сьцягам.
Зімовыя Алімпійскія гульні пройдуць з 6 да 22 лютага 2026 году ў італьянскіх гарадах Мілян і Картына-д’Ампэца.
Беларускія фрыстайлісты з 1998 году заваёўвалі мэдалі на ўсіх Алімпіядах.
Спрэчкі пра нэўтральны статус
Асобныя фэдэрацыі ў відах спорту безумоўна забаранілі беларускім і расейскім атлетам удзел у турнірах, у тым ліку алімпійскай кваліфікацыі. Так, у прыватнасьці, зрабілі міжнародныя фэдэрацыі біятлёну і лыжаў. Тады ж складанасьці паўсталі й перад паралімпійцамі розных відаў.
Некаторыя ж рашэньні пра допуск спартоўцаў зь дзьвюх названых дзяржаваў выклікалі пратэсты Нацыянальнага алімпійскага камітэту Ўкраіны. І гэта тычыцца ня толькі зімовых відаў спорту. Галоўнае ўпраўленьне выведкі Міністэрства абароны Ўкраіны і Міністэрства моладзі й спорту краіны ўключылі беларускую гімнастку Аліну Гарноську і батутыста Івана Літвіновіча ў сьпіс для ўвядзеньня супраць іх санкцыяў і забароны на ўдзел у міжнародных спаборніцтвах.
Беларускія спартоўцы апынуліся ў сьпісе разам з васьмю расейскімі атлетамі, якія ўдзельнічаюць у «прапагандысцкіх захадах і, нягледзячы на гэта, атрымліваюць нэўтральны статус і працягваюць браць удзел у міжнародных спаборніцтвах». Цяпер на падставе гэтай інфармацыі Міністэрства моладзі і спорту Ўкраіны будзе дабівацца забароны ім удзельнічаць у міжнародных спаборніцтвах.
Вялікае непаразуменьне з боку Ўкраіны ў ліпені 2025 году выклікала Міжнародная фэдэрацыя фэхтаваньня, якая дапусьціла да стартаў 40 атлетаў з Расеі і Беларусі. Сярод расейцаў былі нават дзейныя афіцэры войска. Украіна заявіла, што праверка нэўтральнага статусу беларускіх і расейскіх фэхтавальнікаў была павярхоўнай і парушае ўсе заяўленыя правілы.
Асаблівую ўвагу ў сьпісе дапушчаных прыцягнулі Сафія Вялікая, якая мае званьне маёру арміі РФ, і лейтэнантка Яна Ягар’ян. Гэта супярэчыць рэкамэндацыям МАК, згодна зь якімі атлеты з вайсковымі званьнямі і датычнасьцю да сілавых структураў Расеі і Беларусі ня могуць лічыцца нэўтральнымі спартоўцамі.
Форум